Sanata Muhammad Danjuma Goje, mai wakiltar Gombe ta Tsakiya, ya ƙi amincewa da tsarin yarjejeniya da jam’iyyar APC a Jihar Gombe ta ɗauka domin zaɓen 2027, inda ya ce hakan ya saɓa da tanadin Dokar Zaɓe. Haka kuma, ya jaddada cewa dole ne a bi hanyoyin da doka ta tanada wajen tantance ‘yan takara.
A gefe guda, an tuna cewa shugabannin jam’iyyar a wani taro da Gwamna Muhammadu Inuwa Yahaya ya jagoranta sun amince da tsohon Mataimakin Kwamishinan ‘Ƴansanda, Mohammed Ahmadu Deba, a matsayin ɗan takarar masalaha na kujerar sanatocin da Goje ke riƙe da ita. Sai dai daga bisani, Goje ta bakin mai taimaka masa Barrista Saidu Mu’azu Kumo ya nesanta kansa da tsarin, yana mai cewa an gudanar da taron ba tare da halartar duk masu neman takara ba.
Bugu da ƙari, Goje ya bayyana cewa Dokar Zaɓe ta tanadi hanyoyi biyu kacal na fitar da ‘yan takara, wato yarjejeniya da zaɓen fidda gwani kai tsaye, inda ya ce dole ne a bi su yadda ya kamata domin tabbatar da sahihanci da gaskiya. Ya ƙara da cewa akwai masu neman takara da dama da suka sayi fom amma ba a gayyace su ba, saboda haka tsarin bai cika ƙa’ida ba.
A ƙarshe, wannan rikici ya ƙara tsananta saɓani a APC a Gombe, inda shi ma tsohon Minista Isa Ali Pantami ya ƙi amincewa da naɗin Jamilu Isyaku Gwamna a matsayin ɗan takarar yarjejeniya, yana mai cewa dole ne duk masu takara su amince a rubuce kafin a kira shi yarjejeniya; in ba haka ba, dole a koma zaɓen fidda gwani kai tsaye.
